Adayo.
Nangato.
Idiay laud ti nagtaudan
Dagiti naiimas a makan
Nanam-ay ti biag, nangangato
Dagiti pagnaedan,
Aglaplapusanan dagiti sanikua—
Maibelbellengda laeng
Adu pay ti napapateg a gameng.
Idiay laud ti ayan dagiti
Agkakalapsat a babbai,
Natataraki a lallaki
Adda sadiay ti sirib
Pigsa ken sariti.
Adu a tattao ti agtartarigagay
A mapan sadiay
Dagiti arapaap, sirmata
Ragsak, idiay agur-uray.
Ngata?
Isu met ti kunada.
Ngem ti laud, alun-onenna
Ti init nga impasngay ti Daya.
MIGHTY C. RASING
San Manuel, Isabela
(Naipablaak iti BANNAWAG, Hunio 2, 2008. Nabulod ti imahen iti www.tranceport.org)
