1/31/2009

Wen, Sika, Wen


Always, I wanna be with you
And make believe with you
And live in harmony, harmony

Oh, love...

--Erasure


sika, wen:
datdatlag a burtia ti bursi dagiti sirmata
darikmat nga agnanayon iti pitik dagiti parmata
talek ti tagiruot ti linnaaw dagiti namnama
isem a di maakas iti karayo dagiti agsapa
talugading ti kullayaw ti linabag dagiti rikna
sarming a kasin-awan iti dungngo dagiti sapata

sika a librok lubongko kararuak ispirituk
kadi danonennak 'yallatiwnak alimpatok
talinaay-kinapudno-pia a santak talibagok
'ta ayat, 'toy ayat, ayatta a naipanurok
ta kadi sumken latta, patinayon, di maungpot
misterio-senarion' patempateg, sikansiak, pulos
daniw-samiweng a di mautob, nobela a di aggibus

wen, sika:
sirmata dagiti bursi ti burtia a datdatlag
parmata dagiti pitik iti agnanayon a darikmat
namnama dagiti linnnaaw iti tagiruot ti talek
agsapa dagiti karayo iti di maakas nga isem
rikna dagiti linabag iti kullayaw ti talugading
sapata dagiti dungngo iti kasin-awan a sarming


ROY V. ARAGON
Dupax del Norte, Nueva Vizcaya

(Naipablaak iti VALLEY JOURNAL, Agosto 1, 1994; iti BANNAWAG, Abril 29, 1996; ken iti Burnay E-zine, Febrero 1998. Naggapu ti imahen iti retrato nga ala ni R.V.Aragon; lokasion: Calvary Hills, Iguig, Cagayan)

1/22/2009

Naliday Ti Rummuar a Lawag


Datayo la kadi ti makarikna
no kasano ti rumuk-at iti sipnget
ken mapurar iti lawag
agingga iti in-inut nga agmulagat
dagiti mata tapno maitangkarang
dagiti tao ken banag nga aggargaraw
iti entablado ti biag?

Langit ngata ti katukad ti birhen a panunot?
Liday ti dusa dagiti managsukisok
agingga iti saantayon nga ammo
no kaano nga agbalin nga unget ti liday
wenno kaano nga agbalin a liday ti unget
saan laeng a gapu kadagiti annak ni Maria
a mangilaklako iti dayawda
wenno annak ni Juan a mangisalsalda
iti pigsada iti ganggannaet a daga.

Kasano dagiti ubbing a nayaw-awan
ta napurarda iti lawag?
Isuda a napaidaman nga agpiko
tapno maki-san pedroda iti biag.
Isuda a saanen a nasken
nga agay-ayam iti munieka
ta pudno a maladaga ti aywananda...

Kasano dagiti ina a mangarub-ob
iti luada bayat ti panagpabag-enda
kadagiti Puraw a didiosen?
Kasano dagiti ama a di makarikna
iti bara ti petpet dagiti babassit nga ima
tapno maisaganaanda ti natalged a pamilia?

Agdaldaliasattayo amin
a rummuar iti bagbagitayo
a rummuar iti pagiliantayo
a mangtallikud iti puontayo.
Globalisasion... alienasion...
mannaniw ti nangbuniag kadagiti padas
nga aglemlemmeng iti suli ti puot
a di mayebkas dagiti anniniwan
a nakakul-ob iti sipnget.

Mannaniw ti makaripar
kadagiti aningaas iti aglawlaw
ngem kasano a makagaraw
dagiti nakagalut a takiag
no dagiti laeng naimaldit a balikas
ti kabaelanna nga ilaban
kadagiti kapre nga agdakiwas?

Naliday ti rummuar iti lawag.
Nakalidliday a buyaen
ti pudno a drama iti entablado ti biag!


HERMILINDA T. LINGBAOAN-BULONG
PeƱarrubia, Abra

(Naipablaak iti BANNAWAG, Hulio 30, 2007. Naadaw ti imahen iti retrato nga ala ni R.V.Aragon; lokasion: Karayan Padsan, San Nicolas, Ilocos Norte)

Kasingin 'Ta Isemmo


Intugawko kad' nga inlista
Naikapet a lansa, wenno naigabur a darat
Iti pagtaengan a nagbinnuliganta a pinatakder?
Pinuyatak kad' nga imbinsabinsa kenka
No mano a lampin ti nabordaak,
Wenno mano a lata ti gatas ti naibus
Dagiti maadi-adi a bunga ti panaglantip dagiti pusota?
Adda kadin kanito a dinagullitka
No mano a kilo a karne ti mauraga
Wenno mano kailap a tarong ken karabasa ti maidasar
Iti dulang a linawlaw ti pamilia nga inarapaapta?
Adda kadin tiempo nga inlitaniak
Kinangina ti koriente
Wenno kinaingpis 'tay grade one a papel
Nga impulong ni agadi a nalaka a makunes?
Linibbiak kad' ti inyawatmo a naingpis a sobre
Wenno dinillawko kadi ti nakirang a panangisagutmo
A nalabit kas iti pananguray
Ti mannalon iti mulana nga agdawa
Wenno ti ina a baliksen tagibina ti naganna?
'Yurayko ti pannakaamirismo
A siak, saanmo a kabalubal iti tinnarayan,
No di ket kabulon 'ta luam
Ken kasingin 'ta isemmo.


RACHELLE GARVIDA-BOADO
Bangui, Ilocos Norte
(Naipablaak iti BANNAWAG, Disiembre 31, 2007. Naadaw ti imahen iti retrato nga ala ni R.V.Aragon; lokasion: Ciudad ti Tuguegarao)

Tedted ti Dara iti Sagumaymay ti Kannag


pisangento latta ti rissik ti bala-ti-lunod
ti makabulsek a sipnget; ket maiburandis
dagiti matmaturog a namnama ken kappia
iti let-ang ti kimmigpal a nadagaang a sardam.
agkaribuso dagiti bunar a makiwar iti aponda
a buntuon dagiti dagensen ken awan naganna
nga aliaw: dungparenda dagiti dalingding
ti agkamkammaulaw a lubong tapno isalakanda
ti bukodda a karadkad—tarayan, maidugmam
ken matulidda man iti katapokan—ayatda laeng
a maadaywanda dagiti gulib ti tadem a mangilap
kadagiti dapanda—isuda nga awanan nalawag
a nagkamtudan ken nagbasolanda—ta unayen
a saem ken ut-ot a kasingin dagiti ikkis ti aligagaw
iti dalukdok ti rumiet ken kapan-awan ken kadapuan
a pagdaliasatanda: mabati dagiti agsagsagaba
a daradara a tugotda—agubbog ti luada a manglayus
iti tanem nga isuda a mismo ti nangkurob: siiimatang
ti law-ang a mangin-inaw iti alibuyong ti kimat...

iti tengnga ti rabii, agulimek ti aglawlaw
ngem idiay salogan ken bakrang ti bantay
mayarikiak ti uni ti tukling a ganggandiong
ket maakas ti nagmanto a langit ket mawaknitan
ti kagabgabur a tanem nga awanan nagan...
iti parbangon, akupen ti nagtagipayak nga angin
ti angtem, aglua metten ti main-inaw a bigat:
nalabaga ti maipusing ken mapursing a linnaaw
iti sagumaymay ti Dios-ti-aluadna a kannag...


PRODIE GAR. PADIOS
Sta. Teresita, Cagayan

(Naipablaak iti BANNAWAG, Enero 15, 2007. Naadaw ti imahen iti retrato nga ala ni R.V.Aragon; lokasion: Pagudpod, Ilocos Norte)

1/10/2009

Oda iti Baro a Tawen


I have measured out my life with coffee spoons
--T.S. Eliot, The Love Song of J. Alfred Prufrock

no manen, apirasek ti alipusposmo
iti daan a tapaktapak ti nakemko. amangan
ket no nayakar iti panangpagpagutko
iti ubanmo iti daan a lulonan ti baro a tawenko.
rukodenka kadi met la manen, baro, iti binulan
a pannakalapgis ti kalendario, wenno
iti tinawen a panagbilang kadagiti nabungbong a ramay?

agbunga latta dagiti mata.
masidir latta dagiti siping a saba.
mawingiwingan latta dagiti makaniawan a nagkiwing nga apro.
ket iti sangkataw-an a basol ti nailian nga utek ken ima,
iti panagalsem dagiti lebben a basi,
iti pannakaparkag dagiti daan a bubon
ken pannakakidkid dagiti garong
ken panagmaga dagiti pamguongan,
iti pananglungsot ti maymaysa a kamatis iti sangakuribot,
iti panagibbong dagiti mauk-ukopan nga itlog,
iti nagatel a pannakaabraw ti daludal ti aba,
iti bassit a lana ti masinglag a niog,
iti panagulaw ken panagbakbakuar dagiti babbalasang,
mapabasol latta dagiti ulila a siding iti abaga
wenno dagiti nayaw-awan a sallapiding iti luluaan
wenno dagiti ginggined kadagiti sardam ken parbangon
wenno dagiti managapet kada pattolay kada singkol kada suni;
mainap latta dagiti mangan-annong a baliti,
maatap latta dagiti marmarna ken di makitkita;
maitudo latta dagiti umarikiak a salaksak
wenno dagiti masagang a banias iti kalsada.
ket matulawan latta ti dayaw dagiti pudno a buaya.
ket makastigo latta dagiti ugaw, dagiti dudon, dagiti dangaw
wenno dagiti agbangabanga a tuwato wenno sallapingaw,
wenno dagiti di mangan-ano a wak ken nangisit a pusa.
ket mayatang latta ngarud dagiti adu nga arak, mamaen,
karrurayan, itlog, lapi, ikamen, dalem, kararag ken kankanen.

agin-innapungol dagiti panagem iti kasipngetan ti bumaro a tawen.
agkikinnarawa dagiti daan a tawen kadagiti sirok ti lamisaan.
agkinkinnudkod iti nagatel a bukot dagiti binulan ken linawas
ti naglabas a tawtawen: aggagatel, aggatel metten
ti mapaspasungadan a baro nga al-aldaw, rabrabii: adu pay
a lamisaan ti mapasirokan, adu pay ti mabendisionan
a nailian a mangisalakan. adu pay ti mapulotan iti lana
a nailian a mangikanawa. adu pay ti maordenan
a nailian a mangaskasaba iti pannakasubbot. adu
pay ti mabuniagan iti asin, mapanaganan iti sirok ti latok.

ngem ubananka latta bimmaroka man a tawen, rukodem
latta ti nailian a resolusion kadagiti naray-ab
a kalendario ti dimmaan a tawen.


ROY V. ARAGON
Dupax del Norte, Nueva Vizcaya

(Naipablaak iti BANNAWAG, Enero 7, 2008. Naiposte iti blog ti autor, iti www.mannurat.com. Naadaw ti imahen iti retrato nga ala ni R.V.Aragon)

1/02/2009

Alimbasag 1



Di latta makaidna dagiti ballikidmo
Iti alimuteng ti kayumanggi nga iddam
Rugmaannaka latta ti rumabraba a kebbakebbam
Iti sapsapulem a ridep ken pannakapnek
Iti an-anninawem nga anaraar iti sipnget
Iti sallabawan ken bautek—

Maanninawmo ti ubing a namnama
A kanaig ti alimuteng ti iddam
Duduayyaen ti sennaay ti ina
Agbariw-as kadi ti ubing
Iti makmakraayanen a nateng
Iti maisursursor mapirpirpiran a labba?
Makisinnapulan met latta ti ama
Iti sungbat ti panagmatamata ken panagmalmalanga
Iti labes ti ridaw ken tawa:
Ayan ti karabo a katalali dagiti naisabut a dir-i
Iti suli dagiti kinelleng ken bangkag?
Ti ubing a namnama, isu kadi met laeng
Ti anniniwan iti likudan ti arado?
Inarep-ep ti ina ti ubing iti panio a sigsiglotanna
Ken dagiti layap iti sardam a tantanamitimanna:
Sika, Anakko, ti sabali nga Apo Lung-aw.
Inarapaap ti ama ti ubing kadagiti gurlis ti arado
Ken kadagiti naisabut a dir-i
Iti suli dagiti kinelleng ken bangkag:
Sika, Anakko, ti baro a sual a mangyiras
Iti agal-alawaaw a gasat ti panagtig-ab.
Ngem agtartaraok latta dagiti bingkol
Ni ama, mamarbangon latta a di agsikor
Ni ina, naridam latta nga agaron
Ket ti ubing a namnama, agtuloy laeng a magna
Iti uges ti lapis iti papel a dokumento
Ti biag iti sinamar ti tangkayag—

Agkidemka iti nairut, agwingwingiwing
Dika maawatan ti naaweng latta a sagawisiw
Iti bukot ni kalantangan
Idinto ta awan arindenggan ti pulikkaaw ti mawaw a tuwaw
Dika latta maawatan ti isem ken talingenngen
Ti panagsublisubli a panangarruba ti pagbagasan.
Ania kadi ngamin a birtud ti naibinggas
Iti taraok ti kawitan iti appupo ti bannawag?
Idinto ta makitkitam: agdirdir-i ti kiring
Iti taraok ti karasaen.

Ket maasianka iti ubing
Tukkol ti lapis
Kumelkumel ti papel—


JOHMAR R. ALVAREZ
Ballesteros, Cagayan
(Paset ti koleksion ti dandaniw a "Pito nga Alimbasag" a nangabak iti Maika-6 a Gunggona iti Salip iti Daniw iti Iluko ti Gawad Komisyon 2007 ti Komisyon sa Wikang Pambansa. Naipablaak iti BANNAWAG, Oktubre 29, 2007. Nabulod ti imahen iti superstock.com)